Әхмәдинәҗат: Иран инде атомлы илгә әйләнде

Иран Ислам Җөмһүрияте Президенты Мәхмүт Әхмәдинәҗат үзенең Мисырга рәсми визиты вакытында илнең атом коралы булган дәүләткә әйләнүе хакында белдерде. «Сионистлар» га Иранның һөҗүменнән куркырга кирәкмәве турында ассызыклап узган ил башлыгы.

Дөнья халкы Иранга хөрмәт белән карарга тиеш. “Иран инде атомлы дәүләткә әверелде”,-дип билгеләп үткән Президент хәзрәтләре Мисырда нәшер ителүче “Әл-Әхрам” хәбәрчесе белән әңгәмә вакытында.

Мәхмүт Әхмәдинәҗатның сүзләренчә, Иран Израиль белән сугышырга җыенмый. “Безнең барлык кораллы көчләр илне саклау мәнфәгатен генә күз уңында тота”,-дигән Иран Президенты.

Соңгы берничә дистәләгән еллар эчендә Иран Президентының бу сәфәре Мисырга ясаган тәүге визиты булды. Озак еллар дәвамында шигыйлар җөмһүрияте Мисырда күпчелекне тәшкил иткән сөнниләр белән низагта яшәде. Мисыр Президенты Мөхәммәд Мурсинең соңгы вакытларда ислами сәясәт алып баруы ике илнең якынаюына китерде.

Мисырга килгәч, Мәхмүт Әхмәдинәҗат шигыйларның Каһирәдәге иң зур мәчетенә керде, биредәге илаһият мәктәпләрен карады. Тик ул мәчеттән чыккан чакта Сүрия гражданины аңа ботинка җибәрде, ләкин аяк киеме Иран Президентына тимәде, дип хәбәр итте Russia Today.