Казанда православие җәмәгатьчелеге форумы уза

Бүген Казандагы "Корстон" комплексында II ТР православие җәмәгатьчелеге форумы уза. Чарада ТР Президенты Рөстәм Миңнеханов, РФ Президентының Идел буе федераль округындагы Тулы вәкаләтле вәкиле урынбасары Олег Мельниченко, РФ Президентының эчке сәясәт буенча идарәсенең дини оешмалар белән эшчәнлек буенча департаменты башлыгы Евгений Еремин, Россия югары мөфтие Тәлгать хәзрәт Таҗетдин, Татарстан митрополиясе башлыгы, Татарстан һәм Казан митрополиты Феофан, ТР мөселманнары Диния нәзарәте рәисе, Татарстан мөфтие Камил хәзрәт Сәмигуллин, төрле җирләрдән килгән архиепископ, протоиерейлар, күп санда руханилар һәм башкалар катнаша.

Форумны ТР Дәүләт Советы Рәисе урынбасары, II ТР православие җәмәгатьчелеге форумын оештыру комитеты рәисе Юрий Камалтынов алып бара. Форум дәүләти-дини һәм диннәрара бәйләнешне, дини гыйлемне, православие мәдәниятен һәм социаль гыйбадәтне үстерүгә, җәмгыятьтә тынычлыкны ныгытуга юнәлдерелгән. Форумда республикада православие үсеше мәсьәләләре күтәреләчәк. Әлеге чара изге апостол бөек кенәз Владимир - Русьны чукындыручы истәлегенә багышланган бөтенроссия чаралары кысаларында Татарстанда үткәрелә торган мөһим вакыйгаларның берсе булачак.

Иң элек форумда катнашучылар игътибарына "2014-2015 нче елларда Татарстанда православие үсеше" фильмы күрсәтелде. Аннан соң рәсми затлар сәламләү чыгышларына күчте.
"Татар-информ"