Рашида Исхакый бәете

Ашыкма, әби, чыгырыңнан чыкма,

Вакыт җитәр, бәлки күрерсең.

Меңнәргә исламча яшәүне

Өйрәткән абыстайның

Тормыш юлын шунда белерсең.

Экранда кыска бер мизгелдә

Күрсәттеләр соңгы сәфәрне.

Әле ярый, шуны күреп калдың,

Риза бул да, диген афәрин.

Артист түгел бит ул, көннәр буе

Аның тормыш юлын сөйләргә.

Беренче булып дингә ул өндәде,

Китаплары һәрбер өйләрдә.

Безнең ил шундый ул,

Тукайның да күпме иҗат эшен юк итте.

Ниһаять, олуглап искә алу өчен

Бер гасыр үткәч, вакыт җитте.

Рәшидә абыстайны искә алырлар әле

Ислам дине туры юл алгач.

Икеләнәбез, юллар бүлгәләнде,

Чат итеп аңлату булмагач.

Рәшидә абыстайга карында ук

Ислам дине кергән миенә.

Динебез, йолабызны саклау өчен

Чиксез хезмәт итте иленә.

Намаз китапларын, шигырьләрен

Һәр мөселман булган кешедә.

Өйрәнәбез, динебез алга китәр,

Тыныч бул, абыстаебыз Рәшидә.

Намазларны, ислам йолаларын

Меңнәр, абыстай, синнән өйрәнде.

Салкынча гына озатуларын күреп,

Йөрәгемне утлар биләде.

Илебез шундый,

Бер көн белән яши,

Сездәйләрне сирәк таныйбыз.

Җыр-биюләр алгы планнарда,

Җан азыгын искә алмыйбыз.

Сугыш чоры хезмәтчесе дә син,

Нинди авырлыклар күрсәң дә,

Дингә тугры булдың, намаз, уразаны

Калдырмадың, кайда йөрсәң дә.

Замана дип, күбебез аклана,

Син дә замананың колы соң?

Тугры юлың белән динне куәтләүдә

Барыбыздан да, абыстай, олуг син.

Җәннәттә бул, күпме сөйләсәң дә

Сүзләр бетми синең турыда.

Иман белән үтсәк, бәлки күрешербез

Аллаһының мәңгелек урынында.

2016 елның Рәҗәп ае

Җомга көнне гүр иясе булды.

Шулай салкын озатуларын белеп,

Күзләремә кайнар яшьләр тулды.

Сәмәвия Сафиуллина,

Йошкар-Ола шәһәре.