Гыйрак калаларында берничә шартлау яңгырады

Agence France-Presse агентлыгыннан алынган мәгълүматларга караганда, кичә кич белән Гыйракта берничә шартлау булган. Аларда 70 кеше зыян күргән, 35 инсан һәлак булган.

Баһдадның төньяк, көньяк һәм көнчыгыш өлешләрендә 5 машина шартлаган. Бу районнарда күпчелекне шигыйлар алып тора, дип хәбәр иткән AFP журналисты. Шулай ук Баһдадның үзәгендә дә шартлау булган, дип хәбәр иткән бер каләм иясе.

Болардан тыш, илнең төньягындагы Киркүк каласында да шартлау булган, бер юл кырыенда полиция башлыгы сакчысы янында шартлагыч матдә хәрәкәткә китерелгән. Баһдадның төньягындагы Тарния каласында берәү шулай ук полиция участогына һөҗүм иткән.

Бу шартлаулар буенча беркем дә җаваплылыкны үз өстенә алмаган.

Белгечләр Гыйракта соңгы вакытлардагы шартлауларны сөнниләр белән шигыйлар арасында килеп чыккан низаглар белән бәйлиләр. Илдә Сәддам Хөсәен Президент булган чорда дәүләттәге мөһим җитәкче урыннарда сөнниләр утырды. Гыйракта химик корал ясыйлар дигән сылтау белән АКШ бәреп кергәч, бу җөмһүрияттә сөнниләрне шигыйлар кысрыклый башлаган. Шул рәвешле, илдә тынычлык бетте, чөнки Америка ислам дине вәкилләре арасына чөй какты.