Каюм Насыйриның кабер ташы яңартыла

Нияз хәзрәт Сабиров, чарага килүчеләрне сәламләп, үлгәннәрне искә алу саваплы эш икәнен әйтеп, галимнең фән һәм белем, мәдәният һәм мәгърифәтчелекне таратуга куйган саллы өлешен билгеләп үтте. Каюм Насыйри кабере янына килүчеләр, Коръән аятьләре укыганнан соң, аның рухына бергәләп дога кылды. “Шунысы игътибарга лаек: быел Каюм Насыйриның чардуганы яңартылды. Якын арада каберенә яңа таш та кую планлаштырыла”, - дип хәбәр итте Нияз хәзрәт.

Ул бүген шулай ук К. Насыйри музее җитәкчесе Раушания Шәфигуллина белән киләчәктә хезмәттәшлек итүне ныгыту хакында фикерләште, бергәләшеп рухи-әхлакый чаралар исемлеге барлады. Ике як якын арада музейда Галимҗан Барудига багышланган түгәрәк өстәл оештыру хакында да килеште дип хәбәр итәләр мөфтияттән.