Биектау районында мөселманнар Сабан туе узды

Биектау районының Семиозерка авылында Татарстан мөселманнары Диния нәзарәте вәкилләре – мөфти урынбасары Илдар хәзрәт Баязитов һәм яшьләр эшләре бүлеге җитәкчесе Айнур Әхмәтшин катнашында мөселманнар Сабан туе булып узды.

Сабантуй кунаклары һәм анда катнашучылар алдында чыгыш ясаганда, Илдар хәзрәт аларга мөфти вә үз исеменнән бу бәйрәм уңаеннан котлауларын ирештерде. Аннары ул мондый күркәм бәйрәмне оештырганы өчен бу авылдагы мәчет мәхәлләсе әһелләренә олуг рәхмәтләрен әйтте.

Сабантуй хуҗалары төрле кызыклы бәйгеләр генә оештырып калмаганнар, бәлки кунакларны һәм анда катнашучыларны тәм-том белән дә сыйладылар.

Илдар хәзрәт Баязитовның билгеләп узуынча, 25 июньдә ТҖ МДН бу авылда Казаннан киләчәк 120 инвалид бала өчен Сабантуй үткәрергә җыена дип хәбәр итте "Думрт.ру”.