Төркиядә беренче хатын-кызлар партиясе оеша

Төркиядә беренче хатын-кызлар партиясе оеша. Ул сәясәттә хатын-кызлар һәм ирләрнең тигезлеге өчен көрәшәчәк. Яңа партия вәкилләре киләсе җәйдә Төркиядә узачак парламент сайлауларында катнашырга ниятли. Оештыру комитеты җитәкчесе Бенал Язан сүзләренә караганда, 12 июндә Төркиядә узачак әлеге сайлауларда партиядән ким дигәндә ике бәйсез кандидатура катнашачак.

Россиянең «Новости» агентлыгы хәбәренә караганда, әлеге фирка «Хатын-кызлар партиясе» дип аталачак. «Сәяси партия буларак без илнең мәнфәгатьләренә кагылучы барлык мәсьәләләр белән дә кызыксыначакбыз. Шул ук вакытта без җитәкчелеккә әлеге проблемаларга хатын-кызлар карашын җиткерергә телибез», диде «CNN-Turk» телекомпаниясенә партияне оештыру комитеты башлыгы. Аның сүзләренә караганда, Төркиядәге беренче хатын-кызлар партиясен оештыру эшләре инде бер ел дәвам итә.

Хатын-кыз кандидатларны әзерләү һәм яклау буенча иҗтимагый оешма мәгълүматларына караганда, Төркиянең закон чыгару җыенында хатын-кызлар нибары 9% депутатны гына тәшкил итә. Ә бит алга киткән Европа илләрендә бу күрсәткеч уртача 40%ка тигез. Төркиянең мәҗлесендәге 550 депутатның нибары 48 генә — хатын-кызлар. Барлыгы Төркиядә исә 36,6 миллион хатын-кыз яши.