Кичә Казанның “Иман хәзинәсе”ндә Мәүлет бәйрәме үткәрелде

20 февральдә Татарстан башкаласының «Жемчужина веры» («Иман хәзинәсе») дигән мөселманнар йортында Мәүлет ән-Нәбигә багышланган бәйрәм кичәсе уздырылды. Бу чараны мөселманнар йортының җитәкчесе Тереза Камалова белән аның ире Хәсән оештырды.

Дин әһелләре җыелган мәҗлестә Коръән укылды, Пәйгамбәребезгә мактау сүзләре-салаватлар әйтелде, шул ук вакытта Рәсүлебезнең сөннәтенә ияреп гамәл кылырга кирәклеге турында сөйләшү булды, Мәүлетне-Пәйгамбәрнең туган көнен уздыруның мөһимлеге тикшерелде.

Кайберәүләр Мәүлетне үткәрү ярамый диләр һәм моңа дәлил итеп сәхабәләрнең аны билгеләп узмаулары хакында әйтәләр. Әмма ул чорлар белән хәзергене чагыштыру мөмкин түгел. Сәхабәләр бик тәкъва булганнар, алар һәркөнне Коръән укыганнар, Пәйгамбәребезнең сөннәте белән яшәгәннәр, даими рәвештә зекер кылганнар. Шуңа күрә аларга Мәүлетне үткәрү ихтыяҗы булмаган.

Без яши торган чор турында исә болай әйтеп булмый. Менә шуңа күрә хәзерге вакытта Мәүлетне уздыру зарурилыгы калкып чыкты. Мондый кичәләр вакытында кешеләр Аллаһка якынаялар, Пәйгамбәребез Мөхәммәдне (с. г. в.) еш искә төшерәләр.

«Иман хәзинәсе» йортындагы бу кичә исә моңа ныклап ышандыра торган дәлил булды.