Сары тауда Коръән укучылар бәйгесе булып узды

Узган шимбәдә Сары тау өлкәсенең Яңа Үзән каласында 8-16 яшьлек малайлар арасында беренче районара Коръән укучылар конкурсы үткәрелде.

Төрле районнардан җыелган халык алдында өлкәнең мөфтие, жюри әгъзасы Мөкаддәс хәзрәт Бибарсов чыгыш ясады.

Конкурста катнашучыларны 3 төркемгә: 8-10, 11-13, 14-16 яшьлекләргә бүлделәр. Барлык катнашучыларга да 5 сүрәне яттан белү таләбе куелды. Хөкемдарлар балаларның сүрәләрне дөрес һәм матур итеп сөйләвенә игътибар итте.

Беренче төркемдә беренче урынны-Ярмөхәммәд Арзыев; икенче төркемдә беренчелекне-Тимур Абдушев; өченче төркемдә беренчелекне Абдулмәлик Арзыев алды. Бәйгедә җиңүчеләр һәм катнашучылар истәлек бүләкләренә ия булдылар.

Мөкаддәс Бибарсов конкурска нәтиҗә ясаганда мондый чараны киләчәктә өлкә дәрәҗәсендә үткәрергә ниятләүләре турында әйтте.

Бәйгедән соң балалар һәм кунаклар төрле тәм-томнардан авыз иттеләр, аларны ата-аналары, дуслары котладылар, дип хәбәр итте www.dumso.ru агентлыгы.