Казанда татар морзалары Мәҗлесе җыелачак

14 ноябрьдә сәгать унда Казан Кремле территориясендәге «Хәзинә» сәнгать галереясында Татарстан Республикасы татар морзалары Мәҗлесе җыены узачак. Ел саен үтә торган җыелышка борынгы татар дворян фамилияле буын әгъзалары җыелачак. Җыелышта катнашучылар бер ел эчендә эшләгән эшләргә йомгак ясаячаклар һәм киләчәккә планнар билгеләячәкләр.

Җыенның уникаль өлеше булып Мамлиев, Терегулов, Чанышев, Якушев, Аппаков, Акчурин, Дәүләтяров, Уразаев, Мәкъсутов һәм Кашаевлар нәселенә караганлыкны раслый һәм дворянлыкны дәлилли торган шәһадәтнамәләр (свидетельство) тапшыру булачак.

Татарстан Республикасы татар морзалары Мәҗесе 2005 елны теркәлгән. Бүгенге көндә аларның Мәҗлескә берләшкәннәре — өч йөзгә якын. Болар дөньяның төрле почмакларында: Габитов, Еникиев, Яушев, Чанышев, Терегулов, Әмирханов, Юнысов, Акчурин, Аппаков һәм башка 36 татар дворян нәселе вәкилләре.