Лениногорск районында агач мәчет янган

1 ноябрьдә Әлмәт ЮХИДИ хезмәткәрләре пультына Лениногорск районы Кирлегәч авылы мәчете янган дигән хәбәр килеп ирешә. Беренчеләрдән булып фаҗига урынына Урмышла авылы ОП хезмәткәрләре килеп җитә, бераз вакыт узгач, Шөгер янгын сүндерүчеләре килеп җитешә. Зират янында урнашкан 90 кв. метр күләмендәге агач мәчет бинасы янган була. Утны сүндерүдә барлыгы өч янгын сүндерү бүлеге катнаша.

Әмма, моңа карамастан янгын сүндерелә. Кызганычка каршы тарихи кыйммәткә ия булган элекке гасыр мәчетен саклап калып булмый. Шунысы мөхим, янгында зыян күргән кеше юк. Әлегә тикшерү эшләре алып барыла. Якынча исәпләүләр буенча, фаҗига ут белән саксызлык күрсәткәнгә күрә килеп чыккан.