«Уралда ислам» («Ислам на Урале») энциклопедик сүзлек авторы Свердловск өлкәсе губернаторы стипендиясенә лаек булды

Декабрь башында Урал дәүләт университетының җиде аспиранты Свердловск өлкәсе губернаторы Александр Мишарин стипендиясе алачак, дип хәбәр иттеләр ЕАН агентлыгына югары уку йортының матбугат хезмәтендә.  

Стипендиатлар арасында тарихчы, психолог, математик, химик һәм өч физик-нанотехнолог бар.

Быел стипендиаль жюри беренче тапкыр Свердловск өлкәсе губернаторы стипендиясенә претендентлар рейтингын төзегән. Рейтингта фәнни мәкаләләрнең саны һәм дәрәҗәсе, фәнни конференцияләрдә катнашу һәм укудан тыш активлык исәпкә алына.

Рейтингта беренче урында Урал дәүләт университетының тарих факультетының археология, этнология һәм махсус тарихи дисциплиналар кафедрасы аспиранты Алексей Старостин тора. Яшь галимнең фәнни кызыксыну темалары – Уралдагы ислам тарихы. Ул «Уралда ислам» («Ислам на Урале») дип исемләнгән энциклопедик сүзлек белән чыгыш ясады (2009 елда Мәскәүдә басылып чыкты). Бу басмадагы ике йөздән артык мәкалә шәхсән Алексей Старостин тарафыннан төзелгән. Шулай ук ул Уралда сәламәтлек саклау һәм сәнәгать (промышленность) тарихы буенча да хезмәтләр, Үзәк Азия хезмәт миграциясе мәсьәләләре буенча аналитик мәкаләләр авторы.