Малайзиядә мөселман пансионатлары булдырылачак

Малайзия штатларының берсендә туристлар өчен мөселман пансионатлары булдырырга ниятлиләр. Бу турыда илнең туризм идарәсенә сылтама белән  Islam.com.ua  агентлыгы хәбәр итә.

Илнең төньяк-көнбатышында урнашкан Келантан штаты инде берничә ел дәвамында «дини туризм» үзенчәлекләрен өйрәнә. Әлеге штат бик матур җиргә урнашкан булса да, ерак төбәкләрнең берсе булып санала. Шуңа күрә әлегә бу штатка туристлар күпләп килми.

«Без мөселманнарга «дини хезмәтләр пакеты» тәкъдим итәргә җыенабыз. Әлегә ул өч көнгә исәпләнгән. Тур кысаларында ислам нигезләрен өйрәнү дә күздә тотыла», - дип белдергән журналистларга туризм комитеты рәисе Такиюддин Хәссән. Аның сүзләренчә, ислам дәресләре малайзия авылларындагы мәктәпләрдәге кебек укытылачак. Шул рәвешле, Туристлар Малайзия балалары ни рәвешле белем алуы белән дә таныша алачаклар. «Бердәнбер аерма - туристлар уңайлы мөселман отельләрендә яшәячәкләр», - ди бу уңайдан Такиюддин Хәссән.

Мөселман пансионатларында туристларга ял итү өчен барлык мөмкинлекләр дә тудырылачак. Бигрәк тә Якын Көнчыгыш туристлары әлеге урынны үз итәр, дип көтелә.