Гыйрак мәктәп укучылары сабакларын мәчеттә өйрәнергә мәҗбүр

Гыйрак башкаласы Багдад шәһәрендә торак йортларда ут булмау сәбәпле, өлкән сыйныф укучылары чыгарылыш имтиханнарына мәчеттә әзерләнергә мәҗбүр. Шәһәрнең үзәгендә урнашкан “Әл-Киләни” мәчетенең гыйбадәт залында иртәдән кичкә кадәр үсмерләр җыела. Багдад мәктәпләренең берсендә укучы Әмир Сәбринең РИА “Новости” корреспондентына әйтүенчә, мәчеттә егет үзен җәннәттә кебек хис итә: “Урамда 50 градус эсселек, ә монда – кондиционерлар эшли, салкынча, суыткычта салкын су бар”. Яшүсмер мәчеттә көн саен 12әр сәгать була икән. Ә кайберәүләр хәтта кунача да кала. Ата-аналарга исә балалары өчен борчылырга нигез юк, чөнки мәчет урнашкан район яхшы саклана.

Шул ук хәл Гыйракның башка шәһәрләрендә дә кабатлана: үз электр генераторлары булган мәчетләр бүген китапханәләрне хәтерләтә. Илдә электр энергиясе белән тәэмин ителеш әлегәчә хәл ителмәгән. Шуңа күрә кайвакыт ут көненә бары бер генә 1 сәгать бирелә. Шул сәбәпле Рамади шәһәрендә яшәүче мәктәп укучысы Камаль Втихан имтиханнарга яхшылап әзерләнә алмый – ул яши торган шәһәрдә мәчетләрдә электр станцияләре юк. Камальнең гаиләсе кайвакыт шәхси электр станцияләре хуҗаларына мөрәҗәгать итәргә мәҗбүр, ә бу бик зур чыгыманр таләп итә. “Электр мәсьәләсен хәл итә алмыйлар икән, күбрәк мәчетләр төзесеннәр иде”, - дип зарлана К.Втихан РИА “Новости” хәбәрчесенә.

Бу вазгыятьтә мәчеттә эшләүчеләр укучылар өчен бөтен мөмкин булган шартларны тудырырга тырыша. Чөнки чыгарылыш имтиханнары – яшүсмер тормышында аеруча мөһим вакыйга, ә яшьләр – Гыйракның киләчәге.