Казанда «Яшьләрнең тәрбиягә авыр бирелүчәнлеген җиңү» дигән конференция булды

ТР Диния нәзарәтендә кичә «Яшьләрнең тәрбиягә авыр бирелүчәнлеген җиңү» дип исемләнгән фәнни-гамәли конференция булды. Анда ТР мөфтие урынбасары Вәлиулла хәзрәт Якуп, ТР баш казые Җәлил хәзрәт Фазлыев, ТР Дәүләт Советы депутаты Фәрит Мифтахов һәм төрле министрлыклардан, югары уку йортларыннан, мөселман оешмаларыннан вәкилләр катнашты.

Доклад белән ТР Прокуратурасы вәкиле Җәүдәт Ибраһимов, Тәрбиягә авыр бирелүче балаларның махсус урта белем бирү мәктәбе директоры Нәфис Галләмов, Татар дәүләт гуманитар-педагогика университетында эшләп килүче этномәдәни белем бирүне үстерү үзәге җитәкчесе Камил Насибуллин һ.б.лар чыгыш ясады.

Конференциядә педагоглар, хокук саклау органнары хезмәткәрләре дә катнашты. Алар бергәләшеп тәрбиягә авыр бирелүче балалар белән ничек эш алып барырга, ничек иттереп аларны олы тормыш юлына әзерләргә, тайгак юлдан йолып калырга икәнен сөйләштеләр. Мондый балалар белән эшләүдә ислам дине вәкилләрен дә җәлеп итү кирәк дип табылды. Бу уңайдан Казанның  «Сөләйман» мәчетенең эшчәнлеге үрнәк буларак билгеләп үтелде. Алар инде берничә ел рәттән Тәрбиягә авыр бирелүче балаларның махсус урта белем бирү мәктәбе белән хезмәттәшлек итәләр.