Әссәламүгаләйкүм, кардәшләр!

Асия Гайнуллина

Әссәламүгаләйкүм, кардәшләр!
Сезгә иминлек телим.
Сәлам бирү фазыйләтен
Тәфсилләп сөйләп бирим...

Арагызда җылы хисне,
Арттырачак нәрсәне,
Белдеримме сезгә? – диде,
Аллаһының Илчесе.

Сәламнәрне таратыгыз!
Сәламләгән вакытта,
Җавапларны кайтарыгыз,
Иң яхшырак рәвештә!

Сүздән әүвәл сәлам килә,
Пәйгамбәр шуны әйтә,
Сәламәтлек һәм тынычлык -
Хәерлене теләүдә.

Иң беренче Аллаһы әмере
Атабызга – Адәмгә:
“Сәламеңне тапшыр, - диде, -
Фәрештә - мәликләргә!”

Әссәламүгаләйкүм, мәликләр!
Сезгә миннән сәламнәр!
Вәгаләйкумәссәлам! – дип,
Җавабын ишеттергәннәр.

Вә рахмәтуллаһи вә бәракәтүһү! -
Шуны өстәп әйтәләр.
Рәхмәтен һәм бәрәкәтен
Аллаһы иңдерсен, диләр.

Аллаһының сөеклесе,
Пәйгамбәребезгә - сәлам!
Мигъраҗга менгән кичне ул
Аллаһы белән сөйләшкән.

Аллаһы Тәгалә иң беренче
Сәламен аңа биргән.
Сәлам бирү хасиятен
Пәйгамбәргә белдергән.

Бер – береңә сәлам бирү
Никадәр олуг икән!
Сәламгә җавап кайтару
Фарыз гамәлдән иткән.

Соңгы сулыш килгән чакта,
Сәлам бирер Газраил.
Күркәм җавап бирү – сиңа!
Бу сүздән булма гафил!

Сабыр итүчеләргә
Аллаһы сәламен әйтер.
Күркәм йорты – бүләккә,
Җәннәт бакчасын бирер.

Җәннәттә дә “сәлам” булыр
Мөэмин – мөэминәләргә.
Иманга ул юлны ачар,
Сеңдерсәк күңелләргә!

Йортыгызга кергәндә дә,
“Сәлам әйт!” – ди Коръәндә.
Тынычлык иңсен өйләргә,
Тупса атлап үткәндә!

Ике мөэмин очрашканда,
Кул биреп исәнләшсә,
Аерылып китмәстән алда,
Гөнаһлары кичерелә.

Динебездә без – кардәшләр!
Кардәшлекне ныгыту
Сәламнәре аша булыр –
Изгелеккә омтылу.

Бер – береңне яратмасаң,
Җәннәт күрә алмассыз...
Бу юлына сукмак салган
Сәлам булыр! Аңлагыз!

Бу өммәткә шәфәгате,
Пәйгамбәреннән булган.
Аллаһы биргән Ислам динен,
Күңел сөенечтән тулган.