“Чын ирләр чын аналардан туа” дип исемләнгән түгәрәк өстәл

Татарстан Республикасы мөселманнары Диния нәзарәте Ислам мәдәнияте музее, “Инсан медиа” нәшрият йорты белән берлектә, “Беренче тәрбия дәресләре” дип аталган орашулар циклын башлап җибәргән иде. Беренче очрашуның мөхтәрәм кунагы баш казый Җәлил хәзрәт Фазлыев яшьләрне кызыксындырган күп кенә сорауларга җавап бирде, үзенең гыйлеме, тәҗрибәсе, Коръән, сөннәткә таянып, дәлилле фикерләре белән уртаклашты.

Әлеге циклдан икенче очрашу 23 февраль көненә билгеләнгән. “Чын ирләр чын аналардан туа” дип исемләнгән түгәрәк өстәлдә Россия ислам университеты, “Госмания” мәктәбе мөгаллимнәре катнашуы көтелә. Яшь гаиләләргә, бала тәрбияләүгә кагылышлы фикерләр, сораулар тикшереләчәк.

Очрашу 12.00дә Диния нәзарәте бинасында (Лобачевский урамы, 6 нчы йорт, 3 нче кат) үткәрелә, диелә нәзарәтнең матбугат хезмәте хәбәрендә.