“Татаркино” Туфан Миңнулинның “Мулла”сын экраннарга чыгара

Тулы метражлы фильм республикабызның Әтнә районында август башында төшерелә башлый.

Яңа нәфис фильм Татарстан Президенты Рөстәм Миңнеханов һәм ТР Президенты Аппараты җитәкчесе Әсгат Сәфәрәв ярдәме белән төшерелә

Фильмның күп өлеше Әтнә районында төшерелүе юкка түгел. Чөнки Әтнә театры куйган “Мулла” спектакле яхшы куелышларның берсе дип санала. Актерлар белән Әтнә театрының баш режиссеры Рамил Фазлыев эшләячәк.

Фильмда төшәр өчен танылган актер Марат Бәшәров та чакырылган.

Фильмның сценарие әзер, команда җыелган. Актерларны сайлап алу процессы бара. Беренче кастинг узган инде. Анда Татарстан муниципаль районнарындагы театр артистлары катнашкан. Икенче кастинг бүген булачак.

“Мулла” пьесасы 2006 елда “Яңа татар пьесасы” бәйгесендә ТР Мәдәният министрлыгының Махсус премиясенә лаек булган иде дип хәбәр итә “Татаркино” матбугат хезмәте.

Туфан Миңнуллинның әлеге әсәре моңарчы дүрт театр тарафыннан сәхнәләштерелде. Алар - Әтнә, Минзәлә һәм Башкортстанның М.Гафури исемендәге театры, Г.Камал исемендәге академия театры.

Спектакльнең эчтәлеге шуннан гыйбарәт: эшмәкәр Самат тырышлыгы белән Казаннан авылга яңа имам кайтарыла. Авыл халкын имансызлыктан һәм эчкечелектән коткару эше мәдрәсә тәмамлаган Әсфәндияргә йөкләнә. Әсфәндияр бу максатка ирешә алырмы? Спектакль барышында шушы мәсьәләләр чишелә. Тамашачыга хәзерге вакыттагы имам, дин әһеленең җыелма образы тәкъдим ителә.