Мордовиядә татар теле укытучыларын әзерләячәкләр

М.Е. Евсевьев исемендәге Сарански педагогика институтының филология факультетында татар бүлеге ачыла, дип хәбәр итә «Интертат». Татар теле укытучысы булырга хыялланган абитуриентларга 22 бюджет урыны бүлеп бирелгән.

800 мең тирәсе халык яшәгән Мордовия республикасында 50 меңгә якын татар яши. Бүген Мордовиянең 26 гомуми белем бирү мәктәбендә 2,5 мең бала татар телен үзләштерә.Шуңа күрә татар теле укытучылары кискен рәвештә җитешми. Татар филологиясе факультетын тәмамлаган егет-кызлар педагогларга булган кытлыкны бетерергә тиеш. Шул исәптән аларга Мордовиянең авыл мәктәпләрендә туган телне укытуның сыйфатын күтәрү бурычы да йөкләнә.

Университет җитәкчелеге әлеге факультетны тәмамлаган бер студент та эшсез калмаячак. Аларга сорау зур булачак, дип ышандыра. Яңа белгечлекне үзләштерергә теләүчеләр укырга кергәндә татар теле һәм әдәбияттан имтихан, рус әдәбитыннан, рус теленнән бердәм дәүләт имтиханы тапшырырга тиеш.