Мөселманнар өчен яңа портал эшли башлады

10 июньдә ачылачак III Бөтенроссия ислам китаплары күргәзмәсе кысасында «Мәрҗәни» мәчетендә «Исламский портал» дип аталган яңа мөселман мәгълүмати сайтын тәкъдим итү булачак. Сайтны җәмәгатьчелеккә Россия ислам институты (РИУ) ректоры Рафик Мөхәммәтшин һәм укыту эшләре буенча проректор Рөстәм Батыров тәкъдим итәчәк.

Сайтның төп максаты - зыялы ислам динен, аның традицияләрен халык, бигрәк тә яшьләр, арасында җәелдерү. Шуңа күрә сайтта мәдәният, фән, мәгариф кебек темаларга өстенлек биреләчәк.

Порталда көн саен яңартылып торучы хәбәрләр тасмасы да булачак. Анда Татарстан, Россия һәм башка илләрдә яшәүче мөселманнар тормышын яктырткан яңалыклар урын алачак. Яңалыклардан тыш биредә кызыклы әңгәмәләр, бәхәсләр, аналитик язмалар да урын алачак. Ислам турында тулырак мәгълүмат алырга теләүчеләр өчен «Китапханә», «Мәкаләләр» сәхифәләре дә булдырылган. «Медиа» сәхифәсендә ислам турында төрле кызыклы аудио-видеоязмалар урнаштырылачак. Сайтта шулай ук «Аралашу» бүлеге дә бар. Киләчәктә анда  танылган мөселманнарның блогларын да укырга мөмкин булачак.

Сайт www.islam-portal.ru адресы буенча эшли