Төркия гафу үтенү көтә

«Флотилия свободы» гуманитар миссиясе әгъзаларын үтерү очрагын тикшергән төрек табиблары экспертиза нәтиҗәләрен киң җәмәгатьчелеккә игълан итте. Табиблар әйтүенчә, хокук яклаучылар корабны штурмлаган вакытта Израиль хәрбиләре тарафыннан үтерелгән. Аларның барысының да диярлек башларына атканнар. «Флотилии свободы»дагы 9 төрекнең мәетендә 30лап ядрә табылган.

Шул рәвешле, Төркия Израиль вәкилләренең: «Без утлы коралны үз-үзебезне яклау һәм корбаннарны киметү максатыннан гына кулландык»,- дигән белдерүләрен кире какты.

Төркия Премьер-министры Рәҗәп Тайип Эрдоган әйтүенчә, Төркия гражданнарын чит ил солдатлары үтерү ил өчен көтелмәгән хәл.«Мондый хәлнең соңгы берничә дистә елда бөтенләй булганы юк иде, без рәсми гафу үтенүләр, көтәбез», - дип белдерә ил җитәкчелеге.

Исегезгә төшерәбез, 31 майда Израиль солдатлары гуманитар ярдәм төяп, Газа секторына баручы «Флотилия свободы» корабын тоткарлаган иде. Корабта халыкара хокук саклау оешмалары вәкилләре булган. Бәрелеш нәтиҗәсендә 9 кешенең үлеме турында хәбәр иткән, «Аларга каршы ут ачу үз-үзебезне яклау максатыннан иде», - дип белдергән иде Израиль хәрбиләре.