Мөхтәрәм җәмәгать! Без – мөселманнар. Без сүздә генә “Ислам дине – яхшылык дине” дип сөйләп калмыйча, аны гамәлдә исбат итик. Тәртипле булыйк, тыныч булыйк! 

Әгәр дә без: “Ислам дине яхшылыкка чакыра” дип сөйләп йөрсәк, ә кайберәүләр киресен эшләсәләр мөселманнар белән башка дин вәкилләре арасындагы мөнәсәбәт кискенләшер, һәм безгә яшәү авыр булыр.

Мөселманнар яхшылыкка өндәп, үзләре дә үрнәк булырга тиеш булсалар да, барысы да теләгәнчә булып бетә алмыйдыр, күрәсең. Мөселманнар арасында да караклар, кеше рәнҗетүчеләр, гайбәт сатучылар, ялган сөйләүчеләр һәм кеше үтерүчеләр юк түгел. 

Хакыйки, чын мөселман начар булмас. Ислам дине кешене рәнҗетмәскә куша. Шулай булгач,  башкаларга золым итүче мөселман була алмый. 

Әй, мөселманнар! Ислам дине шулай эшләргә кушамы? Аллаһы Тәгалә безгә Коръәндә шуны әмер иткәнме?

Ислам дине кешегә зарар итәргә кушмый.

Ислам дине бер-береңә ярдәм итәргә, изгелек кылырга өнди. Дуслыклы урында яшәве рәхәт, күңелле.

Мөхтәрәм җәмәгать, бер-беребезне дуслыкка өндик, тыныч-имин яшәү өчен бер-беребезне яхшы, хәерле-файдалы вәгазьләр белән нәсихәтлик! Матур тормыш өчен тырышканлыгыбызны сүздә генә түгел, гамәлдә дә күрсәтик! 

Аллаһ Тәгалә безгә Үзе яхшылыкка өндәргә кушкан.