Иске Казанда Рамазан

Мин бала чакта, Урыс инкыйлабына кадәр, без Казанда яшәдек. Рамазан аенда Казанда сихерле гүзәллек һәм шатлык була, ә беренче сәхәр бигрәк тә матур була иде. Әүвәлге

БӘЙЛЕ
2010 Сен 02

Мин бала чакта, Урыс инкыйлабына кадәр, без Казанда яшәдек. Рамазан аенда Казанда сихерле гүзәллек һәм шатлык була, ә беренче сәхәр бигрәк тә матур була иде. Әүвәлге кичне балалар йокларга иртәрәк җибәрелә иде. Тәмле сәхәр ашларының исләре аңкып тора, йокы да килми. Тәрәзәдән шәһәрне карап ята идем. Һәрбер өй яктыртылган, әйтерсең лә, күктән йолдызлар яуган шикелле иде.

Төн уртасында әнием мине уятырга килә һәм без бергәләп аш бүлмәсенә төшәбез. Анда өстәлдә иң тәмле бәйрәм ашлары тезелгән. Бөтен өй белән, баласы-чагасы да, бергәләшеп сәхәргә торабыз. Таң атар алдыннан, бабакаем сәхәрне ниятләргә Корьән укый, бөтенебез кул күтәреп бергә дога кылабыз. Көмеш нурлар сызылып күк яктыра, кошлар сайрый башлый... Чынлап та Казан сихерле шәһәр икән дип хәйран кала идем.

Иртәгәсен абый-энеләрем белән бергә без соң тора идек. Көн бик тыныч була иде. Урамнарда хәрәкәт аз. Без, балалар, ураза тотмасак та, ара-тирә ачыкканчы “ураза” тота идек. Бабакай һәм әти Корьән укып, тәсбих тартып, сәдакаларыбызны һәм зәкятебезне кемгә һәм ничек бирергә дип сөйләшәләр. Әбекәй һәм әниебез Корьән укып дога кылганнан соң, безнең бәйрәм киемнәребезне һәм фәкыйрьләргә бирергә дип ашлар, сәдакалар әзерлиләр. Балаларга мөмкин кадәр шау-шусыз уйнарга кушалар иде.

Икенде намазыннан соң көн буе тып-тын булган урамнар уяна, җанлана иде. Ифтарга кирәкле ашларны сатып алып, халык өйләренә ашыга. Өйдә ифтар ашын мөмкин кадәр тәмле әзерләргә дип хатыннар мутфакларына җыела. Бөтен урам буенча малайлар муеннарына тасма белән агач тартма асып кәләвә һәм пәхләвә сатып йөриләр. Берсе җырлап йөри: “Кәләвә! Кәләвә! Сатам майлы пәхләвә!” Аңа ияреп икенче сатучы малай кычкыра: “Кәләвәнең кайнары, агып тора майлары!” Тавышлары бөтен Казан урамнарына яңгырый. Шикәр белән балны кайнатып төрле сыйфатта катырган кәлавә бик тәмле була иде. Ачы камыр, ак май һәм чикләвек белән ясаган пәхләвәне дөньяда иң тәмле перәнник дип ярата идем. Казанда бөтен кеше, аз булса да, шул Рамазан татлыларын ифтар чәенә сатып ала иде.

Казанның егерме ике мәчетеннән бик моңлы акшам азаны яңгырый. Халык өйләренә ашыга. Авыз ачалар – су һәм бер җимеш белән. Имкяны булганнар хаҗ хөрмәсе белән авыз ача.

Акшам намазыннан соң гаиләләр җыелып ифтарга утыралар. Ифтардан соң халык тәрәвих намазына юнәлә иде. Урам тулы халык. Мәчет урамы буйлап фонарь яктыртып кәләвә-пәхләвә сатучылар тезелеп тора, мәчетләр тулы була иде. Без мәчеткә керә алмасак, башкалар кебек моңлы тавышлар белән укылган Корьәнне тыңлап, бер мәчеттән икенче мәчеткә йөри идек. Тәрәвихтан соң дуслар бер-берсенә чәйгә барыша иде.

Бәйрәм көне – бу сихерле, матур Рамазан аеның чәчәге. Бәйрәм – якынлашкан саен, һәр кич йокыга киткәнче бәйрәмгә кадәр ничә көн калган дип саный идем – җәннәттән явып төшкән йолдызлар арасында.

 

Разия ДӘҮЛӘТ

Калифорния, АКШ

"Азатлык Радиосы"

Язучы, мөгаллимә, Америка Төрек-Татар Берләшмәсенең беренче әгъзаларыннан булган Разия ханымның бу хәтирәсе Берләшмәнең басмасыннан алынды – Ред.)


Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе