Болгар каласы мәчете манарасы күккә аша

Билгеле булганча, бу көннәрдә оста куллар — Ош каласыннан килгән дини кардәшләр Болгар шәһәрендә эшләп килүче мәчетнең манарасын тагын да югарырак күтәрү гамәле белән мәшгульләр.

Гыйбадәтханәнең имам-хатибы Фәрхәт хәзрәт Минсәгыйревнең әйтүенчә, 12 метрга югары күтәрелгән манараның тантаналы ачылышы сентябрь аеның ахырына билгеләнгән. Хәзерге вакытта тимер конструкцияне плитәләр белән каплау эшләре бара.

«Мәчетнең манарасын күтәрү Рамазан аенда башлану да аерым бер хикмәткә иядер. Бу изге эшне Ош каласыннан килгән үзбәк кардәшләребез башкара. Манара инде 10 метрга күтәрелде. Эшләр әле төгәлләнмәде, тик шулай да бу якын-тирәләр күзгә күренеп уңай якка үзгәрде. Үзбәк кардәшләребез бездә хәтта тәравих намазларына да җитәкчелек итте. Ә матди мәсьәләләрне хәл кылуда безгә эшмәкәр Нәзгәт Мөгаллим улы Мәгърифәтуллин теләп булышты. Аларның барчасына да Аллаһының рәхмәтләре булса иде»,-дип үзенең шатлыгы белән уртаклашты Фәрхәт хәзрәт Минсәгыйрев.

Болгар мәчете манарасында бу эшләр тәмамлангач, аның гомуми биеклеге 34 метрга җитәчәк икән. Тик моның белән генә әле мәчетне төзекләндерү гамәле төгәлләнми. Мәчетне төзегәндә җибәрелгән хаталарны төзәтү (гыйбадәтханәнең эчендәге колач җитмәс баганаларны алу) өчен тагын шактый вакыт һәм чыганаклар сарыф ителер, мөгаен.