Казан зоопаркында көрән аюлар уянды

Казан зоопаркында нибары бер көн аермасы белән 31 яшьлек Кучум һәм 10 яшьлек Фома, ягъни ике көрән аю уянды.
«Кышкы йокыга талу өчен яхшы шартлар тудырганга күрә, аюлар күтәренке кәеф белән уянды. Бу ике атна эчендә аларга үсемлек ризыклары биреләчәк, аннары аюлар аксымлы азыкларга – балык һәм иткә күчәчәк”,-дип сөйләделәр зоопаркның матбугат хезмәтендә.
Кышкы йокыдан уянгач, беренче эш итеп, аюлар үзләре тарафыннан яшереп калдырылган әйберләрен эзләргә керешкәннәр. Фома бассейнда калдырган уенчыгын, ә Кучум көзлектән яшереп куйган ипи катысын казырга тотынган.
4 яшьлек аю баласы Машенька исә йокыга талмаган, чөнки бу гадәткә өйрәтелмәгән дип аңлаттылар зоопаркта.
Чыганак: “Татар-информ”