Иран чит ил очкычын эләктерде. Вакыйга. Татар-Ислам

2013 Фев 24

Иран хакимияте үз илләре биләмәсенә үтеп кергән пилотсыз очкычны эләктереп алулары турында игълан итте. Associated Press агентлыгыннан алынган мәгълүматларга караганда, бу вакыйга кичә, 23 февральдә Иран Ислам республикасының көньягында хәрби өйрәнүләр вакытында барлыкка килгән.

Иран Кораллы көчләре матбугат сәркатибе генерал Хәмид Сәрхеилинең хәбәр итүенчә, Иран Ислам җөмһүриятен саклаучылар корпусының электрон күзәтү чыганаклары илнең күгендә пилотсыз чит очкычны шәйләгәннәр һәм Сирҗан каласыннан ерак түгел урында дистацион рәвештә аны контрольгә алганнар.

Элек Тәһран берничә тапкыр Американың пилотсыз очкычларын эләктерүләре хакында хәбәр иткән иде инде. Алар арасында камилләштерелгән RQ-170 Sentinel моделе һәм 3 ScanEagle авиароботы да бар.

АКШ ислам дәүләтләренә, аерым алганда, Пакистан һәм Йәмәнгә каршы һөҗүм итү өчен пилотсыз очкычларны актив куллана. Мәсәлән, 2011 елда Америка хәрбиләренә, пилотсыз очкыч ярдәмендә, Усама бен Ладенның якын тарафдары Әнвәр әл-Әүләкине юкка чыгару мөмкин булды.

Пентагонда чит дәүләтләргә һөҗүм итү хакында сөйләмәскә тырышалар, аңа аңлатма бирергә яратмыйлар. Пакистан җитәкчелеге исә АКШның үзләрен бомбага тотуына инде берничә мәртәбә ризасызлыгын белдерде.

«Яндекс”тан алынган язманы Хатыйп ГӘРӘЙ тәрҗемә кылды