Альберт Салихов зират башына җитте

11 майда, ягъни бүген, Ирек мәйданында сәгать өчтә Мәрҗани мәчетендәге мөселман зиратын яклап пикет узачак. Казанның Совет районы прокуратурасы Вахитов районы судына мөселман зираты эшчәнлеген туктату турында гариза биргән.

Мөселман зиратын яклау пикетын “Азатлык” татар яшьләре берлеге оештыра. Гомумән, әлеге зират тирәсендә бәхәс инде берничә ай бара. Эш шунда – Казан мэриясенең шәһәр төзелеше идарәсе башлыгы Альберт Салихов әтисенең кабер ташына рәсем куярга теләде, ләкин зират җитәкчелеге моңа рөхсәт бирмәде. Бу турыда матбугат чаралары күп язды. Хәзер кабер ташы тирәсендәге гауга мөселман зиратын яптыруга китерергә мөмкин. Чөнки чиновник Салихов әтисенең кабер ташына барыбер рәсем куйдырырга тели. Ә бу дин кануннары буенча рөхсәт ителми.

Казан мөхтәсибәте җыенында шәһәр имамнары зиратны яклап пикет оештыру һәм Альберт Салиховны отставкага җибәрү фикерен хуплап каршылады. Ләкин шул ук вакытта Татарстан мөфтияте кабер ташы тирәсендә килеп чыккан проблемага үз фикерен белдерми килде.

Александр Долгов