Камил хәзрәт Сәмигуллин Арча районында

Татарстан мөфтие Камил хәзрәт Сәмигуллин бүген Арча мөхтәсибәтенә эшлекле сәфәр кыла.

Сәфәре кысаларында мөфти Арча районы башлыгы Илшат Нуриев белән очрашты. Очрашуда, шулай ук, мөфти урынбасары Рөстәм хәзрәт Хәйруллин, баш казый Җәлил хәзрәт Фазлыев, район имам-мөхтәсибе Раил хәзрәт Гыйләҗев катнашты.

Дин әһелләре район хакимияте вәкилләре белән җирлектәге дини эшчәнлекне оештыру, мәхәлләләрне борчыган сораулар, халыкны исламга дәгъватлау юллары хакында фикерләштеләр.

Әлеге очрашудан соң, нәзарәт вәкилләре Арчаның “Казан арты” музеенда булдылар һәм җирлекнең тарихы, рухи мирасы белән таныштылар.

Аннары биредә район имамнары белән очрашу үткәрелде. Очрашуда Татарстан мөфтие Камил хәзрәт авылларда эшләүче хәзрәтләрнең эшләрен зурлады һәм алга таба динебезгә, халкыбызга хезмәт итүдә уңышлар теләде, Мәүлид бәйрәме белән тәбрикләде. Шулай ук бүгенге вәзгыять хакында аңлатты.

Чыгышлардан соң, нәзарәт һәм хакимият вәкилләре имамнарның сорауларына җавап бирделәр, дип хәбәр итә ТР мөселманнары Диния нәзарәте матбугат хезмәте.

Шуны әйтергә кирәк: Арча мөхтәсибәте иң күп мәхәлләле районнарның берсе санала, быел Арчада 80нче мәчет ачылды.
«Татар-информ»