16 яшьтән - армиягә

Шушы көннәрдә саклык министры Анатолий Сердюков Генераль штабка армиягә чакырылыш кагыйдәләрен эшләп бетерү бурычын йөкләде. Яңа кагыйдәләр чит ил армияләрендәге тәҗрибәгә таянып төзеләчәк. Нигез буларак Германия армиясе алыныр дип көтелә.

Проект буенча егетләргә бер яки ике ел хезмәт итәргә тәкъдим ясалачак. Алар ничә ел хезмәт итәсен үзләре сайларга тиеш. Кызыксындыру чарасы буларак солдатларның хезмәт хакын арттыру күздә тотыла. Ул хәзер аена 500 сум гына тәшкил итә. Яңа кагыйдәләр кертелгәннән соң, бер ел хезмәт иткәндә солдат аена - 7-8 мең сум, ә ике ел хезмәт иткәндә 14 мең сумга якын хезмәт хакы алачак. Әмма шул ук вакытта югары уку йортларында укучы студентларны да армиягә алып китәчәкләр: вузда укучыларга бирелә торган ташламалар бетереләчәк. Әмма студент егет армиягә китү вакытын үзе билгели ала: беренче яки икенче курстан соңмы, әллә дилом алгачмы.

Чакырылыш вакытын 30 яшькә кадәр озайтырга, ә армиягә чакыруны 16 яшьтән үк башларга дигән тәкъдим дә бар. Яңа закон кергәннән соң егетләргә армиягә чакыру кәгазен көтеп йөрергә туры килмәячәк. Армия хезмәте турындагы таныклыкка (приписное свидетельство) ук армиягә чакыру вакыты төгәл билгеләнәчәк, дип хәбәр итә “Труд” газетасы.