Төньяк Кавказ ял үзәгенә әвереләчәк

Россия Президенты Дмитрий Медведев Төньяк Кавказның халыкара туристик-ял итү төбәге буларак үсү проектын хуплаган, дип хәбәр итә “РИА Новости”. “Бу бик кызыклы проект, - ди Президент. – Без Төньяк Кавказдагы республикалар өчен уртак бер юнәлеш табарга тиеш. Аларның һәрберсендә үз сәнәгате, үз авыл хуҗалыгы һәм үз проблемалары бар, ә шуларны берләштереп торучы чылбыр булырлык юнәлеш юк.” Петербург Халыкара икътисади форумы кысаларында үткәрелгән “Яңа туристик юнәлешләр – Төнья Кавказ” сессиясендә чыгышы вакытында Президент бу идеянең гади булуын, әмма аны әлегәчә берәү дә тормышка ашыра башламавына гаҗәпләнүен белдерде. Әлбәттә, бу эштә Европа илләренең тәҗрибәсен дә өйрәнергә кирәк.

Д.Медведев бу проект Төньяк Кавказдагы проблемаларны чишү өчен башлангыч була алыр иде, дип саный. Бу идеянең уңышлы булуына исә табигый шартлар гына түгел, Кавказ халыкларының кунакчыллыгы да ярдәм итәчәк.

Сессия утырышының нәтиҗәсе буларак, РФ Икътисади үсеш министрлыгы һәм Россия субъектлары җитәкчеләре арасында “Төньяк Кавказ курортлары” проектын тормышка ашыру буенча килешү төзелде. Проект буенча Дагыстан, Төньяк Осетия, Карачай-Черкес, Адыгей, Кабарда-Балкар республикаларында 5 тау-чаңгы комплексларын төзү ниятләнә. Курорт җирләренең гомуми мәйданы – 4 мең гектар, проектның бәясе 451,44 миллиард сум булачак.