IV Мөселман яшьләре фестиваленә 150 кеше киләчәк

22-27 июнь көннәрендә Татарстанда IV Мөселман яшьләре фестивале узачак. Аны ТР Яшьләр эшләре, спорт һәм туризм министрлыгы, Татарларның федераль милли-мәдәни мохтарияте, ТР мөселманнары Диния нәзарәте ярдәме белән “Идел” яшьләр үзәге һәм ТР Министрлар Кабинетының Дин эшләре Идарәсе оештыра.

Бүген журналистлар белән очрашу вакытында «Идел» яшьләр үзәге директоры Миләүшә Шәрәпова: «Быелгы программа бик бай. Катаншучылар төрле семинарларда, «түгәрәк өстәл» артында сөйләшүләрдә, социаль акцияләрдә, очрашуларда катнашачак», - дип белдерде. Шулай ук бергәләп көндәлек газета чыгарып бару, «Мәрхәмәт» хәйрия акциясен оештыру күздә тотыла.

Быел фестивальдә 150 кеше катнашачак. Алар - Россиянең төрле төбәкләреннән (Санкт-Петербург, Красноярск, Пермь, Ханты-Манси, Мәскәү һ.б.лар) җыелган мөселман яшьләре. Алар быел үз төбәкләрендәге мөселман оешмалары эшчәнлеге буенча хисап та тотачак.

Фестивальне ачу тантанасы 22 июньдә «Кол Шәриф» мәчетендә булачак. Аннан соң яшьләр Болгарга юл ала.