«Сөләйман» мәчетендә кызлар өчен лагерь ачылды

Бүген «Сөләйман» мәчетендә кызлар өчен лагерь эшли башлады. Ул 20 көн дәвам итәчәк. Кызлар берничә төркемгә бүленеп ял итә. Алар арасында күрмәү буенча инвалидлар да бар. Аланда балалар ислам нигезләре буенча башлангыч белем алачак. Аларны намаз, Коръән укырга өйрәтү күздә тотыла. Кызлар өчен спорт һәм күңел ачу чаралары үткәрү дә ниятләнә. Ял итүчеләрне походка, Казандагы, Татарстандагы истәлекле урыннарга экскурсиягә алып бару каралган.

Шулай ук Казан зоопаркына барып, лекция тыңлау, «Казан Кремле» музей-тыюлыгында урнашкан Кол Шәриф мәчетендә, музейларда булып кайту күздә тотыла. Елга порты җитәкчелеге исә кызлар өчен Казансу елгасында ике сәгатьлек экскурсия оештырачак. «Кырлай» паркы белән  «Коркачык» авиа паркы да балалар өчен бәйрәм оештырырга ниятли.

Мәчетнең имам-хатыйбы Илдар хәзрәт Баязитов бу уңайдан, күп кенә оешмаларның инвалид балалар ял иткән лагерьларга игътибар итүе сөендерә, дип белдерде. Чыннан да, мондый төр лагерьларга ярдәм кирәк. Чөнки гадәти балалар белән язмыш тарафыннан кыерсытылган балаларның бергә ял итүе зур мәгънәгә ия. Авыру балалар җәмгыятьтә үзләрен ким итеп тоймасын өчен аларны сәламәт балалар белән аралаштыру бик мөһим.

10 июльдән исә шушындый ук лагерь малайларны үзенә җыячак.