Чын итәрбез хыялларымны

Сиңа дигән җырым - күптән туды,
Әллә кайчан догам укылды.
Тик син генә, әллә кайда әле,
Бераз гына күңелем тулды.
Хатын-кызга тиеш йомшаклыкны -
Битарафлык алмаштырдымы...
Елмаюым ихлас, әмма ләкин
Һәрбер кеше күрә бит аны.
Онытырга бәлки хыялларны?
Шулай да соң, кайчан азагы...
Сүзләр бетә, уйлар гына менә
Алары бит гел дә дәвамлы.
Мин шулардан азапланмас өчен
Эшләр белән күмәм вакытны.
Тирә-якка сәлам бирәм, көн дә,
Мөһимлеккә алмый саннарны.
Ә тәүлекләр уза, минутлары -
Бармый һич тә укларга каршы.
Өч дистәне ваклап, утызынчы
Каршы алдым алтын айларны.
Өметләнәм берчак икәү бергә,
Укырбыз без иртән намазны.
Ә аннары, тәмле чәйләр эчеп,
Уятырбыз көзге кояшны.

Лилия Сәлахетдинова