Татарстан мөфтие 9-10 ноябрьдә Франциядә Европа Советы конференциясендә катнаша

Әлеге конференция Европа Советы уздыра торган башка зур чаралар белән берлектә үтә. 7-9 ноябрь көннәрендә мәгариф проблемаларына багышланган Бөтендөнья демократия өчен форумы үткәрелә.

Халыкара дәрәҗәдәге чаралар террорчылыкка һәм экстремизмга каршы торуда дини фактор роленә җәмәгатьчелек игътибарын ныклап җәлеп итү максатыннан оештырыла.

Әлеге чараларда Татарстан мөфтие Камил хәзрәт Сәмигуллинның да катнашуы көтелә.

Конференциядә ике темага сөйләшү каралган:

1. Мәдәни һәм дини күптөрлелек контекстында гражданлыкка кагылышлы белем;

2. Радикальләшүгә һәм экстремизмга каршы көрәштә хатын-кыз һәм гаилә роле.

Конференциядә һәм форумда Европаның һәм Россиянең күренекле дин әһелләре, җәмәгать эшлеклеләре катнаша.

Европа Советы – кеше хокуклары, демократик үсеш, мәдәниятара мөнәсәбәтләр өлкәсендә хезмәттәшлеккә ярдәм итүче халыкара оешма. Европаның 1949 елда нигез салынган иң өлкән халыкара оешмасы булып тора. Аның составына 47 дәүләт керә.

Әлеге оешма Европа берлегенә кермәгән мөстәкыйль оешма санала, дип хәбәр итә мөфтиятнең матбугат хезмәте.