РФ мәгариф һәм фән министры Мордовиядәге мәктәптә яулык мәсьәләсе нисбәтеннән: “Суд карар кабул итте – хиҗапка мәктәптә урын юк!”

Билгеле булганча, Азюрка авылындагы мәктәптә мөслимәләргә яулык бәйләп йөрүне тыйдылар. Бу 2018 елда футбол буенча чемпионат уздыру алдыннан экстремизмны булдырмый калу максатыннан эшләнгән дип әйтелде.

“Бу инде беренче генә хәл түгел. Мондый хәл берничә ел элек Ставраполье краенда булган иде инде. Конституция суды хиҗапка мәктәптә урын юк дигән карар чыгарды. Бу аның теге яки бу милләткә кагылышлы булуы белән аңлатылды. Шуңа күрә мин әлеге мәсьәлә Конституция суды тарафыннан хәл ителде дип саныйм”. – диде О.Васильева.

Министр сүзләренчә, ихластан дин тоткан кеше атрибутикага өстенлек бирергә тиеш түгел. Бигрәк тә мәктәптә. О.Васильева шул вакытта белем бирүнең дөньяви булуын билгеләп үтте.

“Мин сезгә башкача әйтәм. Әгәр сез совет вакыты хроникаларын хәтерләсәгез, безнең Төньяк Кавказда да, Краснодар крае да, Ростов өлкәсендә дә, Россиянең башка өлкәләрендә дә хатын-кызлар, кияүгә чыккач, чәчен яшергән, яулык бәйләгән, әмма бу күренешнең дин белән бәйлелеге шулкадәр зур түгел”, - дигән О.Васильева. Бу хакта «БИЗНЕС Online» эшлекле газетасы хәбәр итә.