Журналист Хәдичә Исмәгыйлева 7,5 ел төрмәгә хөкем ителде

Коррупцияне фаш иткән Әзербайҗан журналисты Хәдичә Исмәгыйлева "салым түләмичә дәүләт бюджетына зыян китерүдә" гаепләнеп, җиде ел ярымга төрмәгә хөкем ителде.

Әзербайҗан журналисты Хәдичә Исмәгыйлеваны хөкем итү эше җиде ел ярымлык төрмә җәзасын белдерү белән тәмамланды. "Азатлык" радиосы белән дә хезмәттәшлек иткән Исмәгыйлева хакимияттәге коррупцияне тикшерә иде. Журналистка "салым түләмичә дәүләт бюджетына зыян китерүдә" гаепләү белдерелде.

Кичә Исмәгыйлева чыгышының ахырына якынлашканда президент Илһам Алиевны һәм башка югары түрәләрнең исемен телгә алу белән прокурор аның чыгышын туктатуны сорады. Исмәгыйлева бу гаепләүләрне кире кага һәм бу мәхкәмәнең сәясәт белән бәйле булуын белдерә.

Халыкара бүләкләр иясе, 39 яшьлек Хәдичә Исмәгыйлева Әзербайҗан хакимиятләрен иң нык тәнкыйтьләүчеләрнең берсе. Amnesty International узган елның декабрендә кулга алынган журналистны “вөждан тоткыны” дип атады. Журналистларны яклау комитеты бу хөкем процессын аның журналистлык эше өчен үч алу, дип бәяли.

7 августта башланган хөкем процессын күзәтү мөмкинлеге бары кайбер дәүләтләрнең Бакуданы илчелекләре хезмәткәрләренә генә бирелде. Бәйсез журналистлар һәм активистлар мәхкәмә утырышларына кертелмәде дип хәбәр итте "Азатлык.орг".