Рамил Юныс: “Мине Кол Шәрифтән алу өчен Кремль белән килешү төзеделәр”

Татарстан Диния нәзарәте һәм “Казан Кремле” дәүләт тарихи-архитектур һәм сәнгать музее-тыюлыгы, “Казан Кремле” фонды арасында килешүгә кул кую артында ни ята?

Килешү нигезендә мәчетнең бөтен дини эшләре мөфтият карамагына тапшырылды.

Кол Шәриф мәчете имам-хатыйбы Рамил Юныс әлеге килешү аны мәчетттән алу өчен имзаланды дип саный. – Килешүгә кул куюны бер елга кадәр сузып килдек. Чөнки аның рәсми якларын җайлыйсы бар иде. Шулай да мөфтият җаен табып, килешүгә кул куюга иреште. Моның максаты бер – мөфтияткә ошамаган имамнарны, галимнәрне эштән алу. Төгәлрәк әйткәндә, бу килешү мине мәчеттә эшләтмәү өчен ясалды -, диде Рамил Юныс.

Имам Рамил Юныс мәчеттән китү турында боерык чыкканчы, соңгы секундка кадәр халыкка, бигрәк тә яшьләргә вәгазьләр сөйләргә планлаштыра. Мәчет өчен сугышып ятарга җыенмый. Рамил Юныс сүзләренчә, бу эшләр афәтнең башы гына, реформалар әле моның белән генә бетмәскә ошый. Диния нәзарәтенең матбугат һәм пропаганда бүлеге җитәкчесе Ришат Хәмидуллин исә килешү бары юридик мәсьәләләрне хәл итү өчен төзелде дип белдерде.

Александр Долгов