Миңнеханов, Мөхәммәтшин, Шәймиевне “Коткаручы” Барстан баш тартырга чакыралар

Саратов мөселманнары Диния нәзарәте президиумы Татарстан президенты Рөстәм Миңнеханов, Дәүләт Советы рәисе Фәрит Мөхәммәтшин һәм “Яңарыш” фонды рәисе Минтимер Шәймиевне Болгар шәһәрендә Барс сынын урнаштырудан тукталып калырга чакыра. Ислам дине кабул ителгән урында мәҗүси сын куелса, саратовлар Болгарга бармаячак.

Саратов өлкәсенең Ершов шәһәрендә мәчет төзү һәм Болгарда сын куйдыру турында җыелыш узган. Саратов мөселманнары Шәһри Болгарга “Саклаучы” Барс сыны куйдыруга кискен каршы чыга. “Бу очракта Болгарга бару мөселман өчен куркыныч тудыра. Сын куелса, мөселманнарны Болгарга йөрүдән туктарга чакырачакбыз”, диелә мөфтият мөрәҗәгатендә.

“Мәҗүси билгеләре булган Барсны Болгарга урнаштыру фикере Татарстан мөселманнарын гына түгел, бөтен Россия мөселманнарын борчуга салды, негатив тудырды. Россия мөселманнары өчен Болгар – 1090 ел элек дәүләт дәрәҗәсендә Ислам дине кабул ителгән урын. Шуңа бу урынны сыннар куеп пычратырга ярамый”, дип әйтелгән Татарстан җитәкчелегенә юлланган хатта.

Александр Долгов