“Татар кунакханәсе” мәдәни-тарихи проекты кысаларында “Л.Н.Гумилев хезмәтләрендә Евразия күчмә халыклары дөньясы” дигән лекция булды

Лекцияне Л.Н.Гумилев музей-фатирының өлкән фәнни хезмәткәре Алексей Бондарев алып барды. Ул Бөек даланың күчмә халыклары тарихы турында сөйләде.

А.Бондарев Лев Гумилевның, күчмә халыклар тарихын һәм мәдәниятен тирәнтен өйрәнеп, Евразия халыкларына олы ихтирам белән каравын әйтте. Шуңа күрә дә Л.Гумилевның “Борынгы төркиләр” дигән фәнни хезмәте дә “Бу китапны безнең туганнарыбызга – Советлар берлегенең төрки халыкларына багышлыйм” дип башлана. Борынгы төркиләрнең кешелек тарихында зур әһәмияткә ия булуын билгеләп үтеп, бөек галим, үкенеч белән: “...бу халыкның тарихы бүгенгә кадәр язылмаган. Ул өстән-өстән һәм кыскача гына бирелде...”, - дип язган. Л.Гумилев галим-гуманист буларак, һәрвакыт һәр халыкның мәдәнияте үзенчәлекле икәнлеген, тулы булмаган этнослар юклыгын әйтеп килгән.

Лекциядә шулай ук “Л.Н.Гумилев хезмәтләрендә Үзәк Азиянең күчмә цивилизацияләре”, “Л.Н.Гумилевның күчмә халыкларда дәүләтчелек барлыкка килү мәсьәләләренә карашы” дигән һ.б. темалар каралды.

Әлеге лекция зур кызыксыну тудырды. Анда татар иҗтимагый оешмалары вәкилләре, студентлар һәм иҗат әһелләре катнашты.