Бүген Казан Кремле территориясендә Казан ханнары җәсәдләре җиргә иңдереләчәк

18-20 май көннәрендә республикабызда VIII Бөтенроссия татар дин әһелләре җыены бара. Дин әһелләре гадәттәгечә беренче-икенче көнне җыелган проблемалар хакында фикер алыша, өченче көнне “Изге Болгар” җыенында катнаша.

Җыенның иң дулкынландыргыч мизгелләре 19 май көнне булыр дип көтелә. Бу көнне җомга намазыннан соң көндезге сәгать өчтә (15.00) Казан Кремле территориясендә Казан ханнарының Тарих институтында сакланган җәсәдләрен җир куенына иңдерәчәкләр. Бу хакта Татарстан мөфтияте матбугат хезмәте хәбәр итә. Мәрәсимгә журналистлар да чакырыла. “Ватаным Татарстан” газетасы язганча, таш табутларны пыяла аша багып булачак.