Көн үзәгендә - Рамазанга әзерлек һәм янгын куркынычсызлыгын тәэмин итү

Җыелышларда имамнар Рамазан-шәриф аена әзерләнү, янгын куркынычсызлыгын тәэмин итү, шәһәркүләм язгы җыештыру өмәсендә актив катнашуны оештыру мәсьәләләрен карыйлар.

Шулай итеп, Киров һәм Мәскәү районнары, бүген Авиатөзелеш һәм Яңа Савин районы имамнарының мөхтәсибәт җыелышлары узды. Бишбалта һәм Нурислам мәчетләрендә узган чарада әлеге районнарның барлык имам-хатыйблары, ТР Президенты аппараты, шәһәр мэриясе вәкилләре катнашты. Мәскәү һәм Киров районнарында озак еллар имамлык хезмәтен алып барган мөхтәрәм, аксакал шәхесләргә мөхтәсибәт медальләре тапшырылды.

Җыелыш нәтиҗәләре буенча, Рамазан аена әзерлек барышында беренче чиратта һәр мәчеттә янгын куркынычсызлыгы таләпләрен даими күзәтү, көнкүреш техникалар, электрүткәргечләрнең төзеклеген тәэмин итү, янгын сүндергечләрне тикшертү йөкләтелде. Изге айга әзерлек булып шулай ук әйләнә-тирәне тәртипкә китерү, чистарту, җыештыру тора. Имамнар тарафыннан 28 нче апрельдә Казанда узачак гомумшәһәр өмәсендә актив катнашуны оештыру кирәклеге әйтелде. Бу хакта Татарстан мөфтиятенең матбугат хезмәте хәбәр итә.