Әниләрне "балалар арасындагы көнчелек хисен ничек киметергә" дигән сорау борчый

“Түгәрәк өстәл” артында сөйләшү вакытында әниләр психологка үзләрен борчыган сорауларны биргән. Гадәттә мөселман гаиләләрендә күп бала була. Шуңа күрә дә бик күп әниләрне “балалар арасындагы көнчелек хисен ничек киметергә?” дигән сорау кызыксындырган.

Психологның җававы болайрак булган. Балалар арасында көнчелек хисләре тумасын өчен, игътибарыңны аларның берсенә дә кызганмаска кирәк. Ә көнчелек хисе үзе бер кимчелек булып тора. Бу кимчелекне бетерү юллары турында очрашуда фикер алышканнар да инде. Әгәр бала ямьсез итеп җавап бирә икән, бу инде яшүсмер күчеш чорында үзенең хисләрен йөгәнләп бетерә алмый дигән сүз. Үзен ни сәбәпле шулай начар тотуын ул аңлатып та бирә алмаска мөмкин. Мондый очракларда әни кешегә баласына булган мөнәсәбәтен күрсәтергә, шуның белән баланың бу рәвешле аралашуын туктатырга кирәк, ди психолог.

Оештыручылар хәбәр иткәнчә, өч яшькә кадәр балалары булган әниләрне бала белән йоклау мәсьәләләре борчыган. Бала белән әнкәсе бергә йокларга тиешме, аның файдасы бармы? Беренче айларда бергә йоклау балага да, анага да файдалы икән. Әнкәсе белән бергә йоклау баланы кисәк кенә үлеп китүдән дә саклый икән. Ә ананың баланы имезү белән бәйле процесслары җайга салына.