Татарстанда журналистлар өчен “Бәллүр каләм” XVIII конкурсы игълан ителде

Татарстанда журналистика һәм масс-медиа өлкәсендә “Бәллүр каләм-Хрустальное перо” XVIII конкурсы игълан ителде. Конкурсны ТР Журналистлар берлеге Республика матбугат һәм массакүләм коммуникацияләр агентлыгы белән бергә үткәрә.

Конкурсның максаты - Татарстан журналистларының профессиональ үсешен бәяләү, шулай ук ел дәвамында медиа өлкәсе үсешенә йогынты ясаучы физик һәм юридик затларны, хезмәтләрне һәм оешмаларны ачыклау һәм бүләкләү.

Конкурста журналистика оешмалары һәм ТР Журналистлар берлеге бүлекләре, теле- һәм радиокомпанияләр, нәшрият йортлары, матбугат хезмәтләре һәм башка медиа оешмалар вәкилләре катнаша ала, дип хәбәр ителә ТР Журналистлар берлеге сайтында.

Быел конкурс 11 номинация буенча үткәреләчәк. Алар арасында “Һөнәргә тугрылык өчен”, “ТРның шәһәр һәм район ММЧ”, "Темасы - җирле, осталык - башкалача", ТРның корпоратив, махсуслаштырылган ММЧ", “Ел медиаҗитәкчесе”, “Объектив аша караш”, “Медиапроект”, “Туган тел”, “Журналистикада исем”, "Дебют", "Танылу" кебек номинацияләр бар.

Конкурста катнашучыларның эшләре ТР Журналистлар берлегендә (Казан, Декабристлар ур., 179 йорт) 15 апрельгә кадәр кабул ителә.
Чыганак: "Татар-информ"