Татарстан мөфтие Камил хәзрәт Сәмигуллин Төркиянең дин эшләре идарәсе җитәкчесе, мөфти Мәхмәт Гермезга кайгынамә юллады

Кичә көндез Төркиянең Сүрия чиге буенда көчле шартлау булган. Анда һәлак ителүчеләр саны хәзер 30га җиткән (башта 27 кеше турында әйтелде).

Шанлыурф провинциясенең Суруч өязендәге Амара мәдәни үзәге ишеге төбендә шартлаган һәм кешеләр үлеменә сәбәпче булган бомба “Ислам дәүләте” террористик төркеме эше булуы мөмкин, дип хәбәр итте ТАСС. Биредә социалистларның яшьләр оешмасы федерациясе вәкилләре булган 300ләп кеше яши, һәлак булучылар һәм каза күрүчеләрнең шактые нәкъ менә алар. Шартлау аларның ачык һавада иртәнге ашы вакытында булган.

Шул уңайдан ТР мөселманнары Диния нәзарәте рәисе, мөфти Камил хәзрәт Сәмигуллин Төркиянең дин эшләре идарәсе җитәкчесе, мөфти Мәхмәт Гермезга кайгынамә юллады.

“Бисмилләһир-рахмәнир-рахим.

Мөхтәрәм Мәхмәт Гермез!

Төркиянең Суруч шәһәрендә килеп чыккан теракт хакында авыр хәбәр килеп иреште. Күп сандагы кешеләрнең гомерләрен өзгән фаҗигале хәл күңелләрне тетрәндерде. Татарстан мөселманнары һәм шәхсән үз исемемнән тирән кайгыгызны уртаклашам.

Терактта мәрхүм булганнарның гаиләләренә кайгылы сынауны, зур хәсрәтне күтәрергә Раббыбыз үзе ярдәм итсә иде! Авыр җәрәхәтләр алганнарга тизрәк сәламәтләнергә язсын.

Террорлык гамәлләрен берни дә аклый алмый. Аллаһы Тәгалә илләргә һәм милләтләргә авыр кайгы, әрнү китергән шундый фаҗигаләрдән Үзе сакласын!
Барыбыз да Аллаһтан килдек һәм Аллаһка кайтачакбыз.

Мөфти Камил хәзрәт Сәмигуллин, Татарстан мөселманнары Диния нәзарәте рәисе”, диелгән әлеге язмада.

Чыганак: "Татар-информ"