Киләчәкнең милләт әтиләре вә әниләре

Без дөнья күген йолдызларның яктылыгы белән зиннәтләдек (“Сафта торучылар” сүрәсе, 37-6).

Узган җомгада “Ярдәм” мәчетенә, әйтерсең, яшьлек нурлары бөркелде. Татарстан, Казанның нык егетләре, сөлектәй сылу кызлары ифтар мәҗлесенә җыелды. Иң сөендергәне шул: алар намаз укучылар сафына өстәлде. Егетләр төп залга ашыкты.

Хатын-кызларның намаз уку бүлмәсенә бер төркем кызларның килеп кушылуы үзенә бер өмет белән өртелгән яктылык алып килде сыман. Аллага шөкер, бу көннәрне күрү элек хыялыбызда гына иде бит! Туташларның намаз укулары ныклы ышаныч та тудыра. Димәк, киләчәгебез нигезенә ислам кыйммәтләре, иман салына. Фәкать зирәк зиһен белән калебебезне өйрәнү, анализ ясау дигән хикмәт кенә сорала. Бу мәҗлесне Тәбриз Яруллин оештырды.

Ифтар мәҗлесендә мәчетебез имамы Рамил хәзрәт Ибраһимов яшьләрезгә Рамазан ае фазыйләтләре, ураза тотуның хикмәте – сәламәтлеккә файдасы, савабы хакында тәфсилләп аңлатты. Яшьләрнең шулай бергәләп, берләшеп оешуларына барыбыз да шат булдык, тормышларында аларга уңышлар теләдек.

Әлмира ҺӘДИЯ, “Ярдәм” мәчете, җәмәгать эшлеклесе