Индонезиядә вулкан атылганлыктан, 200 мең кешене эвакуациялиләр

RG.RU дан алынган мәгълүматларга караганда, Индонезиядә вулкан атылу Ява утравыннан башланган. Куркыныч зонадан ашыгыч рәвештә 36 авылдан, ягъни 200 мең кеше читкә чыгарыла башлаган.

Исегезгә төшерәбез: Келуд вулканы Индонезия башкаласы Җакартадан 620 чакрым ераклыкта урнашкан һәм ул илнең иң актив вулканы исемлегенә керә. Кичә, пәнҗешәмбедә, вулкан сәгать ярымлык вакыт эчендә генә атылды. Бүген инде ул тагын да көчлерәк атылу кичерә башлады. Таш ватыкларыннан һәм комнан торган яңгыр кратердан 30 чакрым диаметрдагы мәйданны биләргә кереште.

Күккә куе көл томаны күтәрелде. Ул инде 150 чакрым мәйданга җәелеп, зурлыгы ягыннан илнең икенче каласына барып җиткән.

Индонезиянең Транспорт министрлыгы Җакарта, Соло һәм Сурабайдагы өч халыкара аэропортны ябырга кирәк дигән карарга килгән. Ник дигәндә, әлеге төтеннең очкыч двигателенә эләгүе ихтимал.

Дөрес, Индонезия җитәкчелеге вулканның күпме вакытка сузыласын төгәл генә әйтә алмый. Галимнәр фикеренчә, ул бер атнадан артыкка сузылмаячак. Бәхеткә, вулканнан һәлак булучылар һәм зыян күрүчеләр хакында әлегә хәбәр ителми.