Дагыстанлы Ислам Костуев: Мондый тамашаны беренче күрдем

Бүген Казандагы “Ярдәм” мәчетендә белем алучы 20 мөселман кардәшебезгә Җиңү паркын зиярәт кылу мәрасиме үткәрелде. Моның максаты: дөнья йөзен күрүдән мәхрүм булган инвалидларга ватанпәрвәрлек тәрбиясе бирүдән гыйбарәт иде.

Экскурсияне үткәрүче гид шәкертләргә Неммерсдорф пунктында (ул хәзер Калининград өлкәсенең Маяковский авылы) бер танк, 3 үзйөрешле артиллерия, 2 БТР, 2 йөк машинасына броня тишүче мылтыктан атып, аларны яндырган Советлар Союзы Герое Сабир Әхтәмов, Казанда туып – үскән, 1993 елның 23 февралендә Мәскәүдә вафат булган Советлар Союзы Герое Николай Столяров һәм башка каһарманнар турында сөйләде.

Күрмәүчеләр Җиңү паркындагы экспонатларны: танкларны, очкычларның канатларын, двигательләрен, корпусларын тотып карадылар. Аннары гид аларга сугышта катнашкан танклар, БТРлар, БМПлар, башка төр техника хакында мавыктыргыч кыйсса итеп сөйләде. Күрмәүчеләргә бу, әлбәттә, бик ошады. Алар аннары Мәңгелек ут янында басып тордылар. Гид инвалидларга Татарстан егетләре һәм кызлары кайсы фронтларда сугышта катнашулары турында бәян кылды. Шул чагында Дагыстаннан Казанга дини белем алырга килгән мөселман кардәшебез Ислам Костуев: “Минем мондый күңелле һәм моңсу тамашаны беренче күрүем”,-дип әйтеп куйды.