Быел Россиядән 12 мең мөселман хаҗ кылачак

Россия хаҗиларының беренче төркеме Согуд Гарәбстанына Уфа каласыннан 2 сентябрьдә кузгала. Бу хакта Россия Мөфтиләре Шурасы рәисе урынбасары Рушан Аббясов хәбәр итте. ТАССтан алынган мәгълүматларга караганда. ул РФ Советы Федерациясендә хаҗ темасына багышланган утырышта катнашкан.

“Хаҗиларның беренче төркеме Уфадан 2 сентябрьдә китә, аннары башка төркемнәр 4, 6 сентябрьдә юлга кузгалачак”,-дигән Р. Аббясов.

Мөселманнар Мөхәммәд Пәйгамбәрнең тормышы белән бәйле изге урыннарда, Мәккә һәм Мәдинә шәһәрләрендә Корбан бәйрәме вакытында булачаклар.
Тик быел беренче тапкыр Согуд Гарәбстаны рәхсәт иткән 16,4 меңлек квотаны россиялеләр үти алмаган. Мөфтиләр Шурасында моны доллар курсының күтәрелүе һәм юл бәяләренең артуы белән аңлатканнар.

Турфирмаларның сайтыннан алынган мәгълүматларга караганда, быел хаҗ кылуның бәясе 2,9 мең доллар – 8,5 мең доллар арасында булган. “Турфирма утырышында әйтелгәнчә, квотадагы 20 процент урын үзләштерелмәгән”,-дигән Р. Аббясов. Ягъни быел 16,4 мең мөселман урынына хаҗга 12 мең кеше генә барачак.

Хаҗ вакытындагы куркынычсызлык чаралары турында илдәге мәчетләрдә үткәреләчәк махсус курсларда аңлатачаклар. Ял көннәрендә гыйбадәт кылучыларга хаҗда үзеңне ничек тотарга һәм Якын Көнчыгыштагы хәлләр турында төшендерәчәкләр.

Язма “Татар-информ”нан алып тәрҗемә ителде