Барлык инсаннар өчен зур сөенеч: бу җомгада Күзләре күрмәүче мөселманнарны тернәкләндерү үзәге ачыла

Бүген Татарстан мөфтие урынбасары, Казандагы «Сөләйман» мәчете имам-хатибы Илдар хәзрәт Баязитов мәхәллә халкына һәм биредә дини белем алучы күзләре күрмәүче мөселман шәкертләргә куанычлы хәбәр ирештерде: 19 июльдә, ягъни киләсе җомгада Коләхмәтев-Серов урамнары чатында төзелгән Тернәкләндерү үзәгенең тантаналы ачылышы була.

"Сез бу җомгада тарихи вакыйганың шаһитлары булачаксыз. Күзләре күрмәүче мөселманнарны Тернәкләндерү үзәгенең тәүге шәкертләре булу бәхете насыйп булачак сезгә!”-диде ул шатлануын яшермичә.

Әйе, ихлас күңелдән куанырлык бу вакыйга. Аның ачылышын Россиядәге меңәрләгән күзләре күрмәүчеләр дә, мәхәллә халкы да зарыгып көтте. Бу үзәк 2008 елда төзелә башлап, шушы көннәрдә салынып бетте. Россиядә тиңе юк аның.

Аена 120 кешене укытуга исәпләнгән 3 катлы бинаның мәйданы 2800 квадрат метрны тәшкил итә. Ә Тернәкләндерү үзәгенең гомуми мәйданы бер гектардан артык. Манарасының биеклеге – 40 метр. Әлеге үзәкнең ирләр һәм хатын-кызларга намаз уку өчен аерым фарыз заллары, китапханәсе, спортзалы, ашханәсе һәм йокы бүлмәләре бар. Фарыз залында 500 кеше намаз укый ала. Яңа үзәктә күзләре күрмәүчеләр һөнәр дә үзләштерер, дип көтелә.

Кыскасы шул: без сезне шатлыгыбызны уртаклашырга – 19 июльдә сәгать 12дә Тернәкләндерү үзәгенең тантаналы ачылышына чакырабыз, мөхтәрәм җәмәгать.

Хатыйп ГӘРӘЙ