Бүген «Ярдәм» мәчетендә хәләл ризык татыдык

Бүген, ягъни изге җомга көнендә “Ярдәм” мәчетендә хәләл ризыкларны татып карау тантанасы үткәрелде. Аны коммерцияле булмаган “Милли хәләл индустрия ассоциация»се (МИХИА) һәм «Ярдәм” фонды оештырды.

Ризыкларны татып карауның төп максаты – халык арасында хәләл ризыкны пропаганлау, продукциянең көндәшлеген күтәрүгә ярдәм итү, дип билгеләп үтте МИХИАның башкарма директоры Флера Абдуллина.

Дегустациянең бер үзенчәлеге аны мәчеттәге күрмәүчеләргә һәм БЦП инвалидларына татытып караудан гыйбарәт иде. Ризыкларны халыкка татытып карау мәҗлесендә МИХИА директоры Илназ Якупов та катнашты. Ул халык алдында чыгыш ясап, хәләл ризык мәҗлесен үткәрүдә аеруча күп өлеш кертүчеләргә - Лена Колбаевага, Фәрит Заһидуллинга, Ләйлә Сөләймановага һәм башкаларга МИХИАның мактау грамоталарын тапшырды. Шундый ук Мактау грамотасы “Ярдәм” мәчете имам-хатибы Илдар хәзрәт Баязитовка да бирелде.

“Ярдәм” мәчетендә тәүге хәләл ризыкларны татып карау 6 июньдә уздырылган иде. Анда 500ләп кеше катнашты. Икенчесендә дә шуннан ким булмагандыр.